Baʼzi olimlarning fikriga koʻra, ularning birinchilari bir necha ming yil avval taxminan bir vaqtda Shimoliy Amerika, Avstraliya va Misrda paydo boʻlgan. Bugungi kunda ular har doim qaytib keladi deb hisoblanadi. Biroq bu unday emas. Boz ustiga, ularning qaytib kelishi koʻp hollarda mutlaqo istalmagan. Qaytib kelganlari esa koʻpincha sehrli deb hisoblanib, naqshlar bilan bezatilgan va hatto muqaddas yodgorlik sifatida saqlangan. Ularni ayting.

Bumeranglar. Keng tarqalgan fikrga zid oʻlaroq, har qanday bumerang ham uloqtirilgandan keyin yoy chizib, otuvchiga qaytib kelavermaydi. Aksincha, ogʻir jangovar bumeranglar hech qanday holatda orqaga qaytib kelmasligi kerak. Aytgancha, Birinchi jahon urushida inglizlar tomonida jang qilgan avstraliyaliklarning qurollari orasida kichik granatalar oʻrnatilgan bumeranglar ham boʻlgan. Tabiiyki, bunday "sovgʻa"ning qaytib kelishiga hech kim umid qilmagan.