Jozef Monye ismli bir ixtirochi fransuz bogʻboni 1867-yilda oʻzining gul tuvaklarini an'anaviylardan koʻra yengilroq va mustahkamroq qilish yoʻlini oʻylab topdi. Keyinchalik uning ixtirosidan nafaqat gul tuvaklari yasashda foydalana boshlashdi va uni "Monye temiri" deb atashdi. Xoʻsh, u aynan nimani oʻylab topgan va hozirda "Monye temiri" nimadan tayyorlanadi?

Monyening xayoliga beton konstruksiyalarni mustahkam qilish uchun ularning ichiga temir sterjenlar qoʻyish gʻoyasi kelgan. Shunday qilib temir-beton paydo boʻlgan, qum va sement qorishmasiga qoʻyiladigan armatura esa "Monye temiri" nomini olgan. 1873-yildan Monye oʻz ixtirosini kengroq joriy etishga harakat qila boshladi. Hozirda armatura poʻlatdan tayyorlanadi.